الجمعة، ٩ نوفمبر ٢٠٠٧

مصر ياأما يا سفنجة

هناك مقولة منسوبة لـ عمرو بن العاص ردا على رسالة الخليفة عمر بن الخطاب يطلب منه وصف مصر
رد قائلا : نيلها عجب وليلها طرب ونساءها لُعب والناس فيها مع من غلب.اعتقد ان هذا اوجز وابلغ تعبير عن حال مصر على مر العصور


ربما عصرنا هذا زاد على كل العصور فى التعقيد والتردى المتشابك وزاد عليه اغتصاب الوصاية على الناس فالكل يتحدث باسم المواطنين ويتخذ القرارات والمواقف نيابة عنهم دون رأى او تشاور بل تعدى الامر الى الحديث باسم مصــر وعنها والادهى ربطها باشخاص بدلا من ان يرتبط الاشخاص بها



فمثلا النظام يعتقد انه هو مصر وانه هو الشعب فانسحب ذلك على كل شئون (المحروسة) ومالا يدرك عواقبه الكثيرون هو تأصل هذا الفكر لدى المؤسسات الكبرى وعلى راسها الامنية التى يشغلها أمن وسلامة النظام قبل أمن وسلامة الوطن !! ومما يخشى منه تراجع أمن وسلامة (المحروسة سابقا)!!ا


اما الحزب الوطنى او كما يصفه احد الاصدقاء بـ (الكذب الوطنى)ا

يتشدق مسئولوه بانه حزب الأغلبية ..عن أى أغليبة يتحدثون !! ؟



لابد انهم يقصدون الناس اللى مع من غلب


ما ابشع الكذب والنفاق والمداهنة التى تنزف من كل جنبات هذا الحزب!! ومن تابع بعض من وقائع مسرحيته السنوية التى يسمونها المؤتمر العام للحزب فى الايام الماضية يدرك تفاقم هذا الامر ومدى تكريس التلاعب باحلام وآمال الناس

اما احزاب المعارضة فلا تختلف كثيرا فهى تتحدث عن كونها احزاب الأغلبية الصامتة والمدافعة عن حقوق الناس والحاملة لهمومهم وقضاياهم والمعبرة عن احوالهم وتطلعاتهم واتساءل بأمارة ايه!؟!ا


أما الناس فمشغولين فى الجرى والمصارعة لملاحقة الثلاث وجبات اليومية ولا وقت لديهم
لترف السياسة وتقلصت احلامهم الى حد الحلم بالعيش مستورين فقد اعطاهم رئيسهم الحق فى هذا الحلم ، عندما قال فى احد احاديثه : من حق المواطن ان يحلم بشراء قميص جديد له أو لابناءه
اجد نفسى الآن اتذكر حديثا دارفى اواخر الصيف الماضى بينى وصديقى الكاتب والمخرج المسرحى اشرف ابو جليل هنا فى مطروح عن احوال مصر ومستقبلها الغامض والمخيف وكنا فى ضيافة الصديق الصحفى على الشوكى وزوجته الأديبة ام العز السنينى وحضور الصحفى الشاب وائل ممدوح
وكان لـ ابو جليل تعليق من بين كلامه اعجبنى قال : ان الكل يحتكر الكلام بأسم مصر ويراها كما يهوي وحسب ايديولوجيته ان كان يساريا او حزب وطنى او اخوانيا او غير ذلك والحقيقة ان مصر اشبه بالأسفنجة التى غمست فى الوان مختلفة وكلما رأى احدهم بقايا من لونه قال الله مصر كلها بلونى والجميع يتجاهل انها اسفنجة خاوية من الداخل

لاعجب ان اشعر انا وغيرى بفتور نحو اشياء كثيرة كان لها فى نفوسنا عظيم الاثر قديما مثل ( الحماس الوطنى/ اسم مصر / العلم/ المصلحة العامة / الاغانى الوطنية/ الولاء/ الانتماء/ ............. ) اشياء كثرة اطفئوها داخلنا وان كانت وستظل باقية مادمنا لانها اشياء تخصنا وحدنا فلا احد يستطيع ان ينتزع حلما او املا يلتصق بجدار الروح

هناك ١٥ تعليقًا:

أميرة محمد محمد محمد يقول...

تدوينه رائعه تعبر بالفعل عن حال البلد المؤسف من حق اي شخص ان يري مصر كما يريد بدون ان يعتدي علي حقوق الاخرين او يحجر علي ارائهم وان يخدم البلد و الناس و ربنا ينتقم من اللي و صلها للدرجه دي

ghalia يقول...

للأسف يا حسن هم بالفعل نجحوا فى انهم يشغلوا المواطن المصرى عن المشاركة فى أى شئ يخص السياسة وغير السياسة كمان
كتفوه بأعباء الحياة والبطالة والغلاء والسعى ورا لقمة العيش
فأصبح المواطن بيدور فى دايرة مقفولة مش عارف اذاى ولا إمتى حيطلع منها
هو ده حالنا ببساطة شديدة
وياعالم حنفضل كدة لحد امتى

غير معرف يقول...

من حق المواطن ان يحلم بشراء قميص جديد له أو لابناءه

بفضل ارشادات وتوجهات سيادة الرئيس والسادة أعضاء الحزب
اصبحت اكبر آمال وأحلام المواطن المصرى محصورة فى قميص جديد له وكمااان يطمع ويفترى ويجيب لأولاده


يكفيهم الآن ما زرعوه من حقد وكراهية ورغبة فى الاقصاء فى نوس الشباب

الشباب اللى ضحكوا على عقولنا واحنا صغيرين برأفت الهجان وجمعة الشوان
وفىالناية

اصبح الانتماء والفداء وهم وأكذوبة بعد ما جحدت تلك الحكومات من أفنوا حياتهم فى خدمة اراضى الوطن


وتقوللى انتماء ووطنية وحب الوطن؟؟

كل دى اصبحت ديناصورات منقرضة

تحياتى على الكلام اللى وجعنى أوى

sahr يقول...

عمار يامصر

dr.Roufy يقول...

فعلا الناس ملهية في لقمة العيش الى هما مش لاقيينها حاف حتى
وكل واحد من الى انت قلت عليهم بيتكلم باسم مصر..اسم مصر الى اتمسخت..من الفقر والفوضي والفساد
وبقينا احنا نفسنا مش عارفين ليه بقت عاملة زي السفنجة بتقبل اي لون..واي مادة وان كان قلبها خاوي وموجوع
الكلام يطول..عن حالنا ومآلنا
وعلى اسم مصر التاريخ يقدر يقول ما شاء
وعلى اسم مصر الحكومة تقدر تقول ما تشاء
ومصر عندي أحب وأجمل الأشياء

سفنجة..سفنجة بقى
برضه بنحبها

حسن مشالي يقول...

أميرة محمد محمد محمد
اهلا بك
وشكرا على رقة كلماتك
ارفع يدى معك واقول آميـــــــــن

تحيــــــاتـى

حسن مشالي يقول...

ghalia

شكرا ياعزيزتى على المتابعة والتواصل الدائم

ندعو الله أن يعجل بالصلاح
ويفك عننا الهم دا

تحيـــــاتــى

حسن مشالي يقول...

شـــــهــــروزة

سلامتك من الوجع ياجميل

وبعدين انتى هاتجبيها فـىّ ولا ايه
انت موجوعه زينا كلنا واى وجع احنا فيه!! ربنا مايجعله مزمن ويزيح عننا الهم والبلاوى اللى طابقة على انفاسنا

تحيــــــاتــى

حسن مشالي يقول...

sahr

انت شايفاها عمار !!يابختك
عقبالنا

تحـــــــياتــى

حسن مشالي يقول...

dr.Roufy

كلامك اضافة جميلة

دا التاريخ هايقول قواله محصلتش

وبعدين حبيها براحتك ياستى دى حاجه منقدرش نغيرها

قدرنا ان نحبها كما ان قدرنا ان نتحمل
سماخة وسخافة وقرف وفساد اللى راكبين على كتافها ومش عاوزين ينزلو وكاتمين على انفاسها وانفاسنا

تحيــــاتــى

loumi يقول...

العزيز حسن

الكلام كله بقا أوجاع فوق أوجاع

ومش عارفه لحد إمتى؟

شيء مضحك فعلاً ان كل فصيل يتكلم
وكأنه المتحدث الرسمي بإسم الشعب
والشعب ولا يعرف عنه حاجه

حزب حاكم واحد
منعزل عن الشعب بشكل تام
المصيبه إنهم بيكذبوا ويصدقوا كذبتهم

باقى الأحزاب
زي قلتها

وربنا يستر
تحياتي

فى القلب يقول...

عجب عجب عجب حياتنا عجب

كلنا بس متفقين على حاجه

أنأحنا ماشين ببركه السمك و اللبن و التمر الهندى


ربنا معانا

حسن مشالي يقول...

لـمـى العزيزة

انها المضحكات المبكيات

ندعو الله ان يولى خيارنا ويصرف عنا شرارنا

ربنا يصلح الحال ويصرف عنا الضر

تحيـــــــــاتـى

حسن مشالي يقول...

فى القلب

فعلا يا اوشا العزيزة

حيلتنا عجب واكثر من العجب

ندعو الله ان يمدنا بالسبب الذى يبطل العجب

والله المستعان على مايصفون

Esmat يقول...

معرفش اللى احنا فيه غلطة مين
اللى سبقونا وسكتوا لغاية ما بقت
عادة متوارثة الهوان بيزيد
والمنافقين اللى لسه بيصفقوا
للحزب ورئيسه
حتى احزاب المعارضة نجحوا يخلوهم
يضربوا فى بعض وينقسموا ال يعنى
مش مكفيهم ضعفهم
اسفا على اسوء عصور مصر نعيشها نحن
ربنا يزيح عنا هذه الغمة
السحابة السوداء
التى غطت انحاء بلدنا