الخميس، ٢٧ سبتمبر ٢٠٠٧

قناة الناس تمنحك صكا للجنة!!!!!!

قناة الناس تمنحك صكا للجنة!!
....بمشاهدتها أو شراء رنة
السؤال مازال قائما: قنــاة النـاس تأخــذك للجنة..!!.. وهى تروح فين..!؟

آسف على تأخري في طرح الموضوع
لأنه زى ما أنتم عارفين محتاج تحضير ومصادر ولبد في الدرة للقناة في الرابحة والجابية



وأنت تشاهد قناة الناس تشوف العجب وممكن تحس بحاجات كتير متناقضة زى القناة بالظبط
مثلا مثلا زى:
ــ ممكن تسبح في فضاء روحاني فسيح
ــ تبقى مشدود لطرح من عالم اوشيخ اوطبيب

وتحمد الله لأنه لم يفوتك هذا التحصيل المعرفي او الشرعي
ــ أن تقع على الأرض مسخ سخ من الضحك
ــ إنك تبقى عاوز تعض قفاك
ــ تبقى عاوز تكسر التليفزيون ومتقد رش

فتغير القناة وأنت بتغلى
ــ تضرب كفوف لان المشايخ فى وادي

والقناة فى وادي تاااااااانى
ــ انك تفضل تتلفت حواليك وتخاف لتكون مش فى بيتك
ــ الحزن العميق على الهيبة والوقار اللى تنازل عنها البعض
ــ احساسك بالقرف من سماجة وغلاسة الافندية
اللى فاكرين ان المشاهدين ابيض ياورد
ــ ولو اتـنصب عليك قبل كدا هتتقلب عليك المواجع

لما يظهرواصحاب الطلعة الاراجوزية بتوع السلع الاسلامية

وحاجات كتير تانى مش عاوز اطول فى المقدمة
علشان ما تقولوش انى ارخم من القناة

نخش فى الموضوع ومش في نيتي أخيش في القناة ولا في اى حد



من أهم القنوات الإسلامية (اقرأ ـ الرسالةـ الناس) وطبعا في غيرهم كنير لكن بضرب مثال فالأولى والتانية فيهم استقرار في الإدارة والتوجه العام وعدم التخبط
رغم ان الأولى تابعة لشبكة(ART)
والتانية تابعة لشبكة روتانا
يعنى الحكاية زى ما هي واضحة كدا
بيعملوا بمبدأ (الحسنات يذهبن السيئات) ياخى....... اللهم إني صايم
المهم ان القناتين اكثر وقارا واحتراما لعقل المشاهد
بعيدا عن اتفاق او اختلاف البعض معهما.
نجى للتالته اللى هى قناة الناس المملوكة لـرجل الاعمال (منصور كدسة) هى وقناة

الخليجية الإسلامية(هشك بشك سابقا) بعد ماصاحبها تاب ولقى انه القنوات الاسلاميه مكسبها مش وحش واهى بتاخد للجنة بالمرة ربنا اعلم بالنوايا .. بس مفيش توبة بالتقسيط .. يعنى الاول قلبوا قناة الناس من ترفيهية الى دينة وبعد نجاحها الكبير اكتملت التوبة وتم قلب الخليجية.. وعملو قناة جديدة (قناة البركة).. وطبعا الناس اتفاجأت اقصد البنى ادمين مش القناة باعلانات وتنويهات قناة الناس عن الخليجية
زى(قناة الخليجية قناة شقيقة..ان انننن/ ، / شاهدو قناة الخليجية فى ثوبها الجديد)ء

يا نهار مكحرت
هى القناة الشريفة العفيفة المنتقبة اللى بتاخد الناس للجنة معاها شقيقة مايصة ومايعة ومخبية (طبعا هيطلع واحد ويقول اذا ابتليتم فاستتروا) ساعتها هاضربه بالشالوت واقوله دا مايمشيش مع الحالة دى ياجلنف
وممكن واحد يطلع يقول ربنا بيقبل التوبة وانتم لأ.. انتم هاتحاسبو الناس على ماضيهم..... هاقوله آه وانت مالك.. احنا مش آلهه ولا بنعلم الغيب ولا النوايا.. احنا لينا الظاهر اللى بيقول إن البشر دى اشتغلتنا احلى اشتغالات... بعد ما رقصونا وهيصونا وميصونا جاييـن يتوبونا !!!.... هو دا كدسة ان كان عاجبكم

سياسة القناة تعتمد مبدأ علماني
يااا حلااااااوة
خلينا فى قناة الناس اللى بتعرف نفسها فى صفحة من نحن على
سيـبك من فقرات: قناة فريدة ومتميزة .. شعار حي .. أهداف نبيلة .. ماذا تقدم القناة ..
تعالوا معايا نخش على فقرة سياسة القناة: وخصوصا السطر الرابع اللى
بيقول : الابتعاد عن السياسة وصراعاتها وعدم تجريح الدول،
يا حلااااوة واخدين بالكم معايا القناة واخدة خط علماني

لا حول ولا قوة الا بالله يعنى لا سياسة في الدين ولا دين في السياسة ...
هذه أول التناقضات

والسؤال: ألم يأتي الإسلام لإصلاح شئون البشر في دينهم ودنياهم !!؟ّ
والسياسة شئون بشر ولا قطط ؟؟
خلاص مش هانطول فى الموضوع دا ونشوفو الادارة

مش هاتكلم عن ازاى بدأت القناة عشوائة ومتخبطة وفقيرة ماديا وفنيا ويمكن دا من أسرار تعاطف الناس معاها وإحساسهم بانها قريبه منهم علشان مافيهاش البهرجة بتاعت دلوقتى إلى أن بدأ يظهر على شاشتها مجموعة من خيرة العلما ء والفقهاء والدعاة فرفعوا نسبة المشاهدة للقناة وزادت الشرائح التى تتابعها بعدما كانت مقتصرة على الحريم المهبولة بتفسير الاحلام وحكايات السحر والجن والعفاريت .. الحاجات دى معظمكم عارفها فمش هلوكلوك فيها
النجــم


عاطـف عبدالرشـيــد قيل اطالة اللحية
نجى للراجل اللى ماسك القناة تشوفه تحس انه طيب وإنسان عادى وترتاح له إلا أنه لا يترك في نفسك أثرا لأنه لا له كاريزما ولا حضور ولا نبوغ واضح عليه ساعات يسبقوا اسمه بلقب أستاذ وساعات الدكتور وانا مش عارف دكتور ايه وعضل ولا وريد مش مهم لكن مظنش انه تخصص إعلام وساعات يقولوا عليه أخونا عـاطـف عبد الرشيـد
وممكن نقول عليه الشيخ عاطف لأنه منذ إطلاق القناة وهو يحافظ على إطلاق لحية قصيرة ولما لعبت البلية مع القناة وبالتالي معاه أطال لحيتة ولكي لا نظلمه ولا نظلم أنفسنا سنفترض انه أطلقها عملا بسنة الرسول الكريم ... والمتابع للقناة يدرك أن الشيخ عاطف من محبي الشهرة والظهور فلا يوجد برنامج أو حلقة إلا ووضع اسمه عليها بصفته مشرفا عاما ليس هذا وحسب بل أيضا زاحم في تقديم البرامج والحلقات وياريت له في الموضوع
فكما قلت سابقا ليس له حضور او قدرة على التحاور( يا جماعة دا بيتلجلج وهو يسأل ) ولا يستطيع استخراج ما يفيد من الضيف وفيه حاجات غريبة تحصل زى انه يكون الضيف يتكلم والكاميرا مسلطة عبد ارشيد...!! والاعجب فى رمضان هو يقدم برنامج يومي (ساعة الفرحة ) من قبل الفطار الى اذان العشاء ولاحظت اكثر من مرة انهم بيأخرو الأذان خمس دقائق لحد مايفض ــ القعدة ــ البرنامج .. وإثناء البرنامج يكون ضيف على الكرسي اللي جنبه بيتكلم تلاقى الشاشة اتقسمت نصين نص فيه الضيف ونص فيه

الاستاذ الشيخ الدكتور أخونا عاطف عبد الرشيد (على فكرة انا بحبه بس مش راضى عن اللى بيحصل)ء
وطبعا بيفطرو اثناء البرنامج وحواليهم فوانيس صينى نورها بيلعب

وتعرفو مين اللى بيفطرهم !؟
..مطاعم مؤمن (اليفطة بتقول كدا).. وطبعا مش من اجل
الثواب ولا لوجه الله لا دا نوع من الدعاية والأعلان
اقول ايه ولا ايه........ء
ء اللوجـــــو


طبعا مشايخ وعلماء كتير فى القناة وغيرها بيقولو الفوانيس بدعة
من ضمن البدع التى خلفها العصر الفاطمى لكن الظاهر ادارة القناة مابتسمعش كلام ضيوفهااو انهم بيحبو البدع فرشقو الاستوديو فوانيس صينى
ومش كدا وبس دا اللوجو بتاع القناة بقى فانوس

بس ممكن يكون فانوس اسلامى ..!!.. الله اعلم

مش مهم البضايع من بلاد الفرنجة
الأهم إعلانات إسلامية مية مية

نجى للحاجات اللى تغيظ وتفقع الـ ....... وهى الاعلانات
وطبعا مفيش حد يقدر يقول انه
الاعلانات غلط ولا عيب ولا حرام
امال القناة تصرف على نفسها ازاى ولا عاوزينها تمشى فى الغلط والبطال .
لكن الغلط والعيب والحرام عليهم هو الكذب والتدليس اللى بيعملوه بالاعلانات
اولا: طريقة الاعلان دايما توحي إن الإعلان بيمثل القناة وليس المعلن بدليل القناة مخصصة شوية افندية ــ دورهم جاىــ لتقديم برامج اعلانية ومعظمها بيكون مباشر
ثانيا: ربط كل السلع المعلن عنها بالإسلام بشكل مباشر أو غير مباشر زى العباية الاسلامية المبرد الاسلامى والرنات الإسلامية وأعشاب الطب النبوي وبطريقة غير مباشرة زى حاجات يمهدو لها بآيات قرآنية او أحاديث ومصطلحات إسلامية والعجيب ان هذه السلع لا تمت بالصلة لا للإسلام ولا للمسلمين ويمكن مفيش مسلمين شاركو فى تصنيعها فهى مستوردة من الصين
وغيرها وعلشان ما اطولش هاقول اعلانين تلاتة واى واحد يحس انه فيه بينهم وبين الاسلام رابط يعرفنى ويكسب ثواب
اعلان المبرد الاسلامى : لوعاوز تتصدق بصدقة جارية ليك او على روح عزيز عليك نقدم لك المبرد الاسلامى بمودلاته المختلفة 1ـ مبرد اسلامى واحد حنفية 2ـ مبرد اسلامى اتنبن حنفية 3ـ مبرد اسلامى تلاتة حنفية4ـ مبرد اسلامى اربعة حنفية ... (موتور المبرد الاسلامى صناعة فرنسية.........!!!)ء
يااااااااى حاجة تخلى الاقرع يشد ودانه والمثال الثانى
اعلان اعشاب الانجاب وطبعا القناة الدينية عاملة فيه حبكة تراجيدية ولعة علشان تلعب على الحالة النفسية والانسانية للمحروم من الخلفة
ويبدأ الاعلان بـ (المال والبنون زينة الحياة الدنيا) ثم السيناريو ظهور زوج مهموم محزون يعتصره الحرمان والحوار المصاحب : انت محروم من الخلفة نفسك تسمع كلمة بابا يتأثر الرجل ويظهر فى الكادر طفل صغير يلعب يسرع اليه ليحتضه فيتحول الى سراب فيعود ليجلس وقد ارتسمت عليه خيبة الامل الحوار نحن نقدم لك اعشاب (بيبى حبيبى) للرجل والمرأة ونتحدى بالتحاليل خلال 21يوم ........... ثم يظهر النطع وهو شايل عيل صغنون وهو فرحان ومزغطط وطبعا علشان القناة دينية فلا تظهر الزوجة لانها عورة.......ان ان اااااااااااان خلص الاعلااااااااان
بالنسبالى لاتعليق لانى فى وقتها قمت بالواجب
التالت هو إعلان رنة الجنة تستمع لصوت مملوء بالورع والخشوع الاستعباطى
يقولك: ليه ماتخليش لتليفونك رنة تكون باب للحسنات ودخول الجنة
......
يا حلااااااوة
ما أسهل دخول الجنة طيب ماكان بلاش دعوة وجهاد وعبادات ونقضيها رنات

ء أم المهازل

نجى لأم المهازل اللى الكل منقوط منها وهى الأراجوزات اللى الواحد منهم بالع راديو ومعاه جهاز اشارة مقدمو برنامج(جديد×جديد) الأعلانى والذى كان رائدهم بالقناة شخص يدعى عبد السلام مفتاح .. يباااااااااااااااى على الدم اللى يلطش وضحكتة تحس انه بيشتمك بيها ولحيته التيوانى.... حوش الغلاسة حوش والكذب والتدليس
وعدم أعطاء المعلن الذي يستضيفة فرصة لقول جملتين على بعض زى مايكون خايف للمعلن يكون عنده دين وضمير ويقول الحقيقة عن سلعتة
ثم جاء بعد ذلك مجموعة من الشباب لتقديم هذه البرامج فاقوه فى كل شى الغلاسة
والسماجة والبرود والاستهبال والكذب والتدليس فى تقديم السلعة واستخفافهم بالعقول وزادوا عنه الخبرة ففيما يبدو ان القناة جابتهم من العيال اللى بيوقفو امام محلات وسط البلد يقطعوا الطريق على الناس ويشدوهم داخل المحلات ليشتروا أو من شارع عبد العزيز فهم يفكرونك بالعتبة والموسكى ايام زمااان ... وابلغ وصف لهم وللسلع التى يعلنوا عنه ماقالته شهروزة فى تعليقها على البوست السابق
أنا عاوز ادعى عليهم واقول ربنا ياخدهم بس مستحرم.. ..فأقول ربنا يهديهم
صاحب نظرية : الدهب زى التراب .. لو انت مؤمن
سعيد توفيق بركات

.
الاستاذ دا صاحب شركة نيو توب للدعاية والاعلان والعبايات الحريمى فجر وفرح وضى القمر ومش عارف ايه اللى بتعرضها القناة على اصنام (مانيكان) رغم ان المشايخ على شاشة القناة اكتر من مرة قالو التماثيل والاشكال المجسمة حرام وكذلك الصور مالم تكن للضروة مثل البطاقة او جواز السفر
المهم سعيد بركات كان بيقدم برنامج (بورصة الإيمان) وكان يقدم حلول نظرية وشبه عملية لبعض المشكلات الاقتصادية
ودراسات جدوى لمشروعات صغيرة ومتناهية الصغر ولاقى هذا البرنامج نجاح وإقبال جماهيري كبير وأتضح ذلك من كم الاتصالات التي تصله على الهواء وخصوصا الستات اللي عاوزة تعمل مشاريع ببضعة الآف أو أكثر وتوافق هذا مع أفكار بركات التى يعرفها http://www.newtop1.com/saedtawfek. في موقعه
الأفكار :1- احترام منهج الإسلام الحنيف لأنه منهج

ـ2ــ معاني الاعتماد على النفس وبناء الذات
ـ3- تقديم إعلام ناجح وهادف لمحاربة كل معاول الهدم فى الإعلام الفاسد .
ـ4ـ مساعدة البشرية للخروج من أزمتها الراهنة لمحاربة الظلم والظالمين
ويبدو أن هذا النجاح مكنه من اللعب فى دماغ بتوع قناة الناس أو صاحبها بعمل قناة اقتصادية ربما يكون شاركهم فيها ايضا وخاصة ان شركته تسيطر على الإعلان في القناة وتمثل مصدر دخل لها .. قد يعتقد البعض ان اختيار اسم (البركة )للقناة لما له من دلالة تؤكدها قناة الناس والبركة ولكن من حقي ان اعتقد بأن اسمها مشتق من اسم (سعيد بركات) لان بركة مفرد بركات وفى رمضان... هو بيقدم برنامج (صناعة أمة) !! دائما مايعلن عنه بفقرة له يقول :( الدهب زى التراب لو انت مؤمن) !!!!!!!!!!
بصراحة انا مش عارف اللى شايفيين فيه فرق بين الدهب والتراب يبقوا أيــه !!
المهم : شركة نيو توب بتاعة الاخ بركات هى اساس هوجة الاعلانات المملة و المقرفة اللى كلها كذب وتدليس فى القناة
وهى الموزع الوحيد على مستوى العالم
لـ[المصحف الألماني]!!!ء
المزدوج الفهرسة لأول مرة في التاريخ الاسلامى !!!ء
وانا سانقل لكم نص الاعلان اللى بيتعرض على الشاشة وفى موقعه :
مميـــــزات المصحف
ـ1ـأول مصحــــف مفهــــــــرس فـــــى التـــــاريخ
ـ2ـ اول مصحــــــــف مــــــزدوج الفهرســــــة فـــــــــى التـــــاري
ـ3ـ حاصـــــــل على بــــــراءة اختــــراع من المـــانيا الاتحاديــــة
ـ3ـ به فهرس خـــارجى للســــــور وفهـــــــرس خارجى
ـ5ـ يساعدك على استخراج السورة المطلوبة والجزء
ـ6ـ فى طبــــــاعة فاخـــــــرة 4 لون ييسر عليك قراءة كتـاب الله
ـ7ـ تنفرد نيوتوب كمــــــوزع وحيــد على مستــــــوى العـــــــالم
ء(لا حول ولا قوة الا بالله ) حتى المصحف ماسلمش من التجار واصبح سلعة للتربح!!!!!!!!!!!!ء
احنا نعرف ان المصحف له (وهبة ) مش سعر+مصاريف الشحن
ونعرف مصحف المدينة المنورة ... لكن مصحف واخد براءة اختراع من المانيا دا شغل جديد .........ء
طيب نعرف منين ان بتوع براءة الاختراع فى المانيا مسلمين وانهم مطهرين علشان يلمسو المصحف لما يفحصوا الاختراع ..؟ ودول ثقة وملمين بالقرآن !!! ؟ ..ولا الحاجات دى مش مهمة فى التجارة أو المتاجرة
ممكن حد يسأل : طيب لو فعلا الفهرسة دي اختراع مأخدتش ليه البراءة من السعودية أو مصر أو اى دولة اسلامية انشاله من جزر القمر ..؟
واعتقد إن دي أجابتها عندي أنا وهى : لو طلبوا من الجهة المختصة ذلك فسيقال لهم هيهي هيهى قديمة لان الفكرة مطبقة فى الاجندات والاندكسات وبعض انواع الدفاتر من زماااااااان .
ولو حصلو عليها من اى دولة اسلامية مش هايتفشخرو ويتقنعرو .. دى المانيا الاتحادية ياجماعة

المشايخ يقدموا مسابقات وفوازير في رمضان

معظم العلماء والمشايخ الذين يظهرون على قناة الناس سئلوا عن شرعية المسابقات التى تعتمد على الاتصال بالتليفون على0900والمحمول وتكون جوائزها مالية او عمرة او حج
فاجاب معظمهم بانها لاتجوز وتعتبر قمار لان المتصل يتكلف المال ويتصل الالآف ولايحصل على الجائزة سوى واحد فقط والذى يستفيد هو منظمو المسابقات بكل الاموال .
لكن القناة استغلت بعض المشايخ لثقة الناس فيهم واشركتهم فى هذه اللعبة
الاستاذ او الشيخ احمد عامر بدأ ظهوره على الشاشات مع التليفزيون المصرى فى برامج تعليم احكام التجويد ثم توالى ظهوره على دريم والناس وغيرهما من الفضائيات المصرية والعربية واعتقد انه نقيب قراء القرآن الكريم فى مصر
وهو متميز فى هذا المجال واستفاد الكثيرون من علمه
و له برنامج ثابت على قناة الناس يشكر عليه
الا انه فى شهر رمضان سقط فى شرك القناة والشركات الاعلانية حيث انه يوميا يقدم مسابقة يسأل سوال ويطلب من المشاهدين الاتصال على ارقام 0900 والمحمول فكيف يقبل وهو يحمل هذا العلم الجليل فى ان يغرر
بالمسلمين لحساب القناة والشركات المستفيدة
وهناك شيخ آخر محمد الصغير ممن يشاركون فى برامج القناة الا انه فى رمضان ترك تقديم العلم وقول الله والرسول للناس وتفرغ ليقدم لهم فزورة يومية يسأل عن الآية ورقمها والصورة التى قيل فيها كذا وكذا وطلب الاتصال......،.....ء

واخر اسمه الشيخ احمد هليل يقدم فزوره أو مسابقة (من الضيف) ويسأل سؤالا مسطحا مثل (من هو ابونا كلنا واللى ربنا أمر الملائكة بالسجود له واسكنه هو وزوجته الجنة وقال له لاتأكل من هذه الشجرة لكن الشيطان اغواهما فكلو منها...الخ
ومش ناقص الا يعطيهم اختيارات
ويقول هو مين : ابو لهب ولا الحجاج بن يوسف ولا هئ هئ ابو الوفا ابوالوفا
والشيخ الجليل يطلب نفس الطلب...................ء
لاادرى كيف سيتلقى المسلمون العلم والمواعظ والفتوى من مثل هؤلاء !!؟
رحمتـــك ياااااااااااااااااااااااارب
معلهـــش استحملـونــى باقى نقطتين بــس والباقى خليه لوقت عوزه

مسخرة البانر وتصالات المشاهدين

اما المسخرة بجد فهو شريط الرسائل حاجة تجيب العار
واحدة تحكى عن حلمها وعاوزة تفسير
وواحد بيدور على واحد مش عارف يتصل بيه
وواحدة تقول: الله يخرب بيتك يافلانة ياخطافة الرجالة
وواحد ظروفة تعبانة وعاوز زوجة تانية
وواحدة تطلب من واحد عجوزعاوز يتجوز بنت صغنونة
المتابعة غدا علشان النور قطع عندها
حفافة (كوافيرة) تريد الزواج من طبيب او مهندس ثرى
وواحد يخاطب اخرى :معلش الرصيد خلص نكمل بكرة
وواحدة امورة ودلوعة ورشيقة عاوزة واحد ثرى والعمر مش مهم
وواحدة عاوزة زوج لاختها والمادة مش مهم
وانسة اربعينية مركز مرموق عندها شقة وعاوزة واحد جاد ومستعدة للتعاون
ومطلقة مظلومة عاوزة تتجوز واهم حاجة الرجولة
مش ناقص الا يطلع واحد ميكانيكى يقول انا عاوز واحدة منضربش فيها مفك
وطبعا الكل فى رساليله يصف نفسه بالتقوى والخوف من الله ويطلب ذلك من الطرف الآخر
اما اتصالات المشاهدين فتجعل الواحد يظن بالمجتمع الظنون
ملحوظة : من الواضح من كم الاتصالات ان نسبة مشاهدة السيدات اضعاف الرجال فاتصال الرجال لايزد عن10% فى اى الاحوال ..
واالعجب العجاب ان القناة واخدة الحلال والحرام نظام قص ولصق يعنى فيه آراء بتقول ان المرأة عورة وصوتها عورة ولو قرأت القرآن فقد منعت ظهور النساء على شاشتها ماعدا فتاتين تحت العشرين بيقدمو برامج اطفال ويبدو ان هناك تعليمات بعدم ظهور وجه اى منهما فواحدة عاملة ماصك بلياتشو وتضع فوق رأسها فروة خاروف لتخفى ملامحها بحجة انها شخصية كاركاتورية للاطفال .. والثانية تظهر وهى تلبس رأس دمية كبيرة
أما مسألة ان صوت المرأة حرام فقد تغاضوا عنها لان السبوبة معتمدة على قلة عقل النساء وكثرة رغيهم فى التليفون
لن اتحدث عن البلاوى بتاعة اتصالات تفسير الاحلام والسحر والاعمال والجن والعفاريت لان هذه البرامج توقفت تقريبا والتعامل فيها مستمر
فالقناة وفرت للحريم المهابيل خطوط للحاجات دى
ولكن الشئ المقزز والمفزع وكما فى تعليقها Esmat على تمهيد هذا الموضوع
ان النساء تخلت عن خجلها وذهب منها الحياء والذى يبين مدى الانحلال الذى وصل اليه المجتمع والغريب ان هذا يكون فى اتصالاتهم بالعلماء والمشايخ الأجلاء مما يضعهم فى حرج وضيق من هذه الامثلة مثل :
واحدة تتصل بأحدهم تقص واقعة زنا محارم حدثت فى بيتهم وتطلب الفتوى والحكم والمشورة !!!ء
وما اكثر الاسئلة التى توضح كم العقوق للأباء والضرب والاهانة والتعذيب
واخرى تتصل لتسأل ماذا تفعل مع زوجها الذى يريد ان يمارس معها الشذوذ (هو انتى مش قادرة تضربيه بالجزمة جاية تسألى الشيخ .. يمكن
نفسك يقولك جايز.. اخص)
واخرى عاوزة تعرف الحكم فى : لما جوزها بيزعلها بتفتكر حبيبها الاولانى
وواحدة جوزها بيطلقها كل يوم وبيسب الدين وبيدنس المصحف وبينكر وجود الله

وبتسأل هى تعمل ايه !!!؟
هذا واكثر تتحدث به بعض النساء فى اتصالاتها... بالاضافة الى كثيرات يتحدثن بنعومه فى الصوت مبالغ فيها قد تصل الى حد المياصة وكأن الواحدة بتكلم الجو بتاعها فى السر وهى تخفض صوتها مما يظهر الضيق على وجه العالم او الشيخ الجليل لدرجة ان بعضهم يطلب الاعتدال فى نبرة الصوت.

احبائــــى فـــى الـلـــــــــه
علمائنا وشيوخنا الأجلاء الذين تعلمت منهم وأفادوني كما أفادوا الكثيرين من أبناء الأمة حفظهم الله ورعاهم ونفع بهم وبعلمهم هم وكل علماء الإسلام

الشيخ رضا طعيمه الشيخ سالم أبو الفتوح الشيخ محمود المصري

الشيخ أبو إسحاق الحوينى الشيخ محمد حسين يعقوب

الشيخ محمد حسان الذي اشهد الله أنى أحبه في الله
بمجرد أن أرى وجهه أو اسمع صوته اشعر بالطمأنينة وأعاود محاسبة نفسي على تقصيرها
حفظه الله للأمة ونفع به وبعلمه الإسلام

وحبيبي في الله الدكتور جمال المراكبى وآخرين مع أن المدونة لن تتسع لذكرهم او لصورهم

في النهاية أوكد انى أحب كل ما تقدمه قناة الناس من علم ودروس شرعية وعلمية
والبعض قد يتساءل كيف تتبعت كل هذا بالقناة فأجيب بأن نسبة مشاهدة القناة عندنا بالبيت مقارنة بالقنوات الأخرى تصل الى75% وما يفوتنى فانا أجند من يراقب كل شاردة وواردة بالقناة (مع انه لوعرف السبب لن يتعاون معى من حبه للقناة)
ء

ولن اذكر أسماء حفاظا على سرية المصادر
أدعو الله ان يحفظ علماء الأمة وان يصلح القنوات الدينية كي تكون إسلامية خالصة في القول والعمل

السبت، ١٥ سبتمبر ٢٠٠٧

قناة الناس تأخذك للجنة ..!!..وهى تروح فين..!؟؟





الموضوع القــــادم



قنــاة النـاس تأخــذك للجنة..!!.. وهى تروح فين..!؟


انه لمحزن ان يستغل خيرة علماء المسلمين بهذا الشكل


وانه لمصيبة ان تستغل مشاعر المسلمين الدينية ويتلاعب بها
لمجرد انهم وثقوا فى القناة وتعلقو بها لظهور كوكبة رائعة من
العلماء ومشايخنا الافاضل الذين نجلهم ولهم مكانة فى انفسنا على شاشتها


انه لعار أن تنهى عن فعل وتأتى مثلة


هذا وأكثر نتناوله قريبا


الاإذا أصلح الله شأنهم وردهم عن تسفيه عقولنا
واستغلال الدين وعلماءه
من اجل المال والاعلانات

الجمعة، ١٤ سبتمبر ٢٠٠٧

رمضان كريم












رمضان شهر الخير والاحسان فيه نعثر على انفسنا التى نرضى عنها
ونتخلص من ضلالات النفس الامارة













هفوات النفس ونزواتها لا تنتهى فيأتى الصيام منحة للمسلم
فهنيئا لمن يحسن استغلالها ولا يكتفى بالقشرة والمظهر
ويقتصر الأمر على انه حالة من الحرمان من الطعام والشراب
وحبسا عن بعض التصرفات تنتهى عند الافطار
فقد جاء الصيام ليهذب النفس ويلجمها ويكبح شهواتها
وكلنا ندرك ماهية ومغزى الصيام
ومن رحمة الله ورأفته بالعباد انه سبحانه وتعالى
يسلسل ويقيد الشباطين فى الشهر الفضيل
ليخفف على الانسان ويتركه فى مواجهة نفسه فقط
فإن غلبها سهل عليه الشيطان
وإن غلبته فما اوهنه امام الشيطان
ومن يقترف اثما او يقع فى ذنب وهوصائم فليدرك ان هذا من فعل نفسه الأمارة بالسـوء
وليس من غواية الشيطان وهنا عليه إن اراد تنقية نفسة وخلاصها
أن يأخذها بالشدة واللين حتى تلــين وتصبح طيعة فى الخير لوامة على الشرور
ومن يخرج من رمضان ولم يفعل بنفسه خيرا
فعلت به الشرور فى باقى الأيام والشهــور
ندعو الله ان يردنا اليه ردا جميلا
ويعيننا على النفس الأمارة
ويهبنا نفسا لوامة
وييسر لنا حـلاله
ويصرف عنا حرامه
ويجعلنا من عتقاء هذا الشهر الكريم



فيه نكون اقرب للبراءة والطهر

اللهم طهرنا ونقنا ونقى انفسنا من كل ما علقت به او علق بها
آمـــــــــــــــــــــــــــــين

الاثنين، ١٠ سبتمبر ٢٠٠٧

سحـر مـدينتـى












هذا الصيــف كــان خـانقـا غريبـا باهتـا
كنت اشعر بالاغتراب في مدينتـي
أسير في شوارعها المزدحمة بالمصيفين
مرتبكا قلقا واحمل ما يكفى من التوتر الذى يدفعني
إلى الانزواء في المكتب
الذي لا يبعد سوى 200متر عن أروع شاطئ
او بالمنزل او مع بعض الأصدقاء
وفوجئت ان هذا الشعور متواجد عند كثيرين
وقد كنت اعتقد انه فردى وربما أرجعت ذلك لأن
أحبائنا لم يأتونا هذا العام وان كان هناك أمل في أن
يشاركوننا سحرها الشتوي في إجازة العيد
...............
.
ولكن أخيرا ها هي مدينتي تسترد الهدوء
انتهى المصيف بكل زحامه وقلقه وتوتره الذي يصيبنا به
فعلا مدينتي ساحرة ومن أجمل واهدأ مدن مصر
هذا في عيون المصيفين وكل من ما يزورها
ولكن مالا يدركه الجميع أنها أكثر سحرا وجمالا
وأكثر هدوءاوعفوية حين يتركها الآخرون
وينفرد بجمالها أهلها آاه لو تعرفون مدى
روعتها وتألقها في الفترات الحارة قبل المصيف وبعده
تمشى فى شوارع هادئة شبه خالية
والأمكنة والبحر شئ مختلف لم تألفه عيون الآخرين
اوااه من جمال البحر وروعة زرقته الناعمة
التي تأخذك إلى عوالم لا متناهية من الصفاء والنقاء والفطرية
تتلامس مع روحك حتى تكاد تتشابه روحك مع البحر

ولو طال بك التأمل فلن تدرى بالزمان ولا المكان
وتعيش لحظة الـ مابين بين حيث لا زمان ولا مكان
وتختلي بروحك في مكاشفة شفافة لا تليق إلا بهذا المكان
مابين البحر واليابسة
تلك اللحظات أعيشها كثيرا مع البحر
وأحيانا نتشارك تلك الجماليات أنا وأصدقائي
وخاصة ذوى الميول الإبداعية
وما أروع أن يخرج الواحد منا برؤية
في لحظات نسترقها من ضغوط الحياة وكآبة المشهد العام
بكل تفاصيله وتشابكاته وتعقيداته المختلفة
آه لو تدركون ألق عيش تلك اللحظات
فلا أصوات من حولك ولا متطفلين
ولاشى من منغصات الواقع اليومي الذي تعيشونه
يمكنها أن يؤثر في تناغم هذا المشهد الجمالي
اذكر ذات مرة جلسنا انا وصديقي المبدع الرائع
الشاعر البهاء حسين أمام البحر لبضع ساعات
دون كلام أو نظرات سوى للبحروبعض الهمهمات
وحين تحدث قال(وما البحر إلا تلك السنين التي مرت علينا)ـ
وقلت :ليت لي ذاكرة الطريق الباهتة أو كالبحر بدون ذاكرة
ضمن هو رؤيته أحدى قصائده
وضمنت أنا رؤيتي أحدى قصصي
وهكذا خرج كل منا في توقيت واحد
وجلسة واحدة أمام مشهد واحد برؤى مختلفة ومتناقضة
مع الأخرى
إنه السحر الذي يلقيه البحر إلى عشاقه
فيولد لديهم انطباعات مختلفة ,أتمنى للجميع أن يعايشوا تلك اللحظات مثلنا
وحين تشعرون بما أقول سأخبركم بمتعة اكبر
وهى أن تعيش الجمال السري لمدينتنا
الذي لا يتبدى إلا في الشتاء
هل جربت المشي على البحر تحت رذاذ المطر
أو جلست في مكان تراقب زخات المطر
وشعرت بالدفء رغم ذلك
أحاسيس ولحظات صعب أن انقلها بالكلمات
فهي كالحلم الممكن أن يعاش





الخميس، ٦ سبتمبر ٢٠٠٧

حكـايــــة البـطـــــة


حكـايـــة البطـــة
كل ما أبص على أحوالنا واللي بيحصل فينا ومعانا وحوالينا مش عارف ليه بفتكر حكاية البطة
اللي حكاها لي واحد زماااااان على انها نكته من نكت جحا وأنا مش عارف هي فعلا لجحا
ولا الذاكرة الشعبية كدا بتحشر جحا فى كل حكايه مجهولة الصاحب او خوفا من عواقب
نسبتها لاى حد وانا هنا مضطر احكيها زى ما سمعتها زماااااااان والعهدة على الراوي
يحكـى أن

..........في زمن زى زمنا وفى بلد يمكن يكون


كان الحاكم بيتمخطر في شوارع مدينته ويهزر مع رعاياه ويناغش كل اللى يقابله
أصلة كان متواضع ويحب يحشر نفسه فى احوال الناس وهما عارفين انه جبار.
وبعد ما عدى دكان جحا الطباخ بشوية رجع تاني على ريحة البطة اللى بيشويها
لما دخل على جحا اتغير لونه وقال فى سره يا مصيبة سودا دا نهار مش هايعدى
وبعد ما الحاكم عبا صدره بريحة البطة وبلع ريقه قال البطه دى لزمانى ياجحجوح
جحا ضحك غصب عنه وقاله احسن منها يكون عندك بعد شويه يا مولاى .
قاله: انا عاوز دى مش غيرها نفسى راحت عليها وهى نادتنى من الشارع
جحا كان نفسه يعيط لكن خاف وقال يامولاي دى بتاعة تاجر فى السوق
جايبها مخصوص من بيته علشان عنده ضيوف
قاله أتصرف يا جحا
يا مولاي صاحبها مش ساهل ممكن يسلمني للشرطة والشرطة للقاضي والقاضي يحبسني
وأنا مقدرش أقول إن سموك اخدت البطه ولو قلت محدش هايصدقنى
الشرطة بتاعة مين يا جحا ؟
بتاعتك يامولاي
والقاضى بتاع مين ياجحجوح ؟
بتاعك يامولاى
خلاص ما تخافش واعمل اللى انت عايزه وانا هاحميك
ولو قلت انى اخدت البطه هاشويك زيها
يلا اديها للحارس
حاضر..في رعاية الله يامولاى بالهنا والشفا يا ومولاى
ولما شافه بيبعد فضل يضرب راسه بايديه ويلطم
ويقول بالسم الهارى.. بالسم الهارى.. بالسم الهارى يامولاى
هو كل ماينزل السوق مسلمش من أذاه ضيع على اجرة شوى البطه
وضيع البطه على التاجر وسابنى فى وش المدفع وقال ايه هايحمينى ههه
يلا خربانه خربانه
وشويه ودخل عليه صاحب البطه :ايه اخبار بطتنا ياجحا ؟
هز جحا رأسه متعجبا وقال : امر بطتك عجيب
وما العجب فى امر البطة ؟
بعد ما دبحتها ونظفتها ووضعتها على النار قالت كاك كاااك وطلع لها ريش وطارت
كيف هذا ياجحا ؟
هو دا اللى حصل
فبادر جحا بلكمه فى وجهه وردها جحا اليه
فضاق الدكان بعراكهم فانتقلو للشارع واتلمت الناس عليهم
وكان جاى فى الشارع راجل مبسوط ومزغطط ومراته معاه قرب من جحا
وقاله: مالك ياجحا بتتعارك ليه
جحا شاف الانبساط على وش الراجل اتغاظ اكتر رفسه برجله هافت منه وجات فى بطن مراته
صرخت ووقعت ع الارض جحا شاف المنظر جرى فى الشارع والناس كلها تجرى وراه

واحد شاف المنظر عمل شجيع مسك جحا وفضل حاضنه بقوة حتى يسلمه للناس
فلم يتمالك نفسه من الخوف فغرس اصبعه فى عين الشجيع فصرخ وترك جحا
وانشغل بنافورة الدم اللى خرجت من عينه
فزاد عدد الناس التى تجرى وراه ولما ضاقت بيه دخل الجامع....دخلو وراه... طلع المادنه ...طلعو وراه
قبل ما يمسكوه رمى نفسه على واحد نايم تحت المادنه وقام يجرى واهل المدينه كلهم وراه
قابله فرارجى راكب حمار ومداين جحا اعترض طريقه بالحمار
وجحا من الخوف والغيظ شد ديل الحمار طلع فى ايده
فاخذ الحمار يتألم ويعنطز ووقع صاحبه فكسر ذراعه
وفضل يجرى حتى دخل مركز الشرطه بجوار بيت الحاكم .
الحاكم سمع الزعيق وبص من الشباك شاف منظر الناس وارتبك خاف ليكون انقلاب عليه
طلب من صاحب الشرطة معرفة الحكاية بسرعة
رجع بعد شويه وقال يامولاى الناس بتجرى ورا جحا وهو هرب منهم ودخل مركز
ال الشرطة
قهقه الحاكم قال: اصرف الناس واكرموا جحا
يا مولاى الناس رفضت الانصراف عاوزين جحا يتحاكم امامهم على جرايمه
جرايمه ؟
ناس هبله جرايم ايه كل ده علشان البطة اللى اكلناها انا وانت والقاضى؟
لا يامولاى دى اقل واحده فيهم
ليه هو عمل ايه تانى ؟ ولا بلاش تقول نسمع من الناس وجحا فى المحاكمة
ثم نظر الحاكم الى القاضى وقال عليك انقاذ جحا وتأديب اهل المدينه الملاعين علشان
لا يكرروها تانى ويتجمعو بالشكل اللى يخوف دا
رد القاضى فى ثقة وهو يمسح شنبه من اثر دسم البطة لا تقلق يامولاى دى لعبتى
وكويس اننا مش ملتزمين بقانون واحد نطبق القانون اللى يعجبنا حسب كل قضية
غسلو ايديهم من اثر البطة وخرجو جميعا الى قاعة المحكمة
وفى طريقهم اخذ الناس بالهتاف : العدل يامولانا القصاص من جحا يامولانا
اشار لهم الحاكم فسكتو فقال: سنحاكمه بالعدل وهذا أفضل قضاتي سيحاكمه أمامكم
نظر بعضهم لبعض وهم يهمسون ربنا يستر
دخل الناس المحكمة ثم ادخلوا جحا فهاج الناس عليه ولولا انه فى القفص لقطعوه
وعندما دخل عليهم الحاكم ومعه القاضى وصاحب الشرطة التزمو الهدوء
وجلس القاضى على المنصة وقال ليس مسموح بالكلام إلا لاصحاب الحق والمجنى عليهم فقط
ويعرضوا مظالمهم وعلى جحا الايتكلم مهما حدث او يدافع عن نفسه
فشعر الناس بالارتياح قليلا وهمس بعضهم بأن اليوم على جحا
طلب القاضى ان يقوم اصحاب الحق ليعرضو شكواهم بالترتيب حسب وقوع الاحداث
فقام صاحب البطة وقال جانى ضيوف من بلاد بعيده فذهبت الى جحا ببطه سمينه ليشويها لضيوفى
فلما ذهبت اليه قال لى ان بطتى امرها عجيب فبعد ان ذبحها ونظفها ووضعها على النار
قالت كااك كااااك وطارت فتعاركنا
فضحك الجميع فأشار اليهم القاضى فسكتو الا الحاكم ظل يقهقه حتى كاد يسقط على الأرض
ولما انتهى قال القاضى سبحان من يحي العظام وهى رميم ووجه كلامه لصاحب البطه قائلا
هل تعترض على قدرة الخالق فى ان يفعل ببطتك هذا
فقال صاحب البطة : لا
فقال القاضى : اذن فقد ظلمت جحا وكنت سببا لمشاكل اخرى
وعليه نحكم ببرائته وبان تدفع غرامه الف دينار.
فبان على الحاكم الارتياح ونظر الناس الى بعضهم ولم يجدو تعليقا
نادى الحاجب اللى بعده
قام الرجل الذى كان مبسوط وهو ينتحب وقال انا ياسيادة القاضى متزوج منذ سنين ولم انجب واليوم فقط كنت مع زوجتى عند الطبيب واخبرنى انها حامل ففرحنا وكنت عاوز ارقص فى الشارع وكنت عاوز الناس كلها تفرح زيي ودا اللى جعلنى اسأل جحا واقوله مالك ياجحا بتتعارك ليه فضرب برجله جات فى بطن زوجتى فسقط حملها
سكت القاضى قليلا وراى التعاطف فى اعين الناس وتململ الحاكم
ثم اكمل القاضى: انت صاحب حق
ولقد افسد جحا حمل زوجتك وعليه نحكم بأن يصلح جحا ما أفسده
فصرخ الرجل لالالالالالالالالا انا متنازل
قال القاضى اذن تدفع غرامة الف دينار لانك رفضت حكم المحكمة .
زاد الصمت فى القاعة ونظر الحاكم للقاضى نظرة وكانه يقول له يا لك من داهية
نودى على اللى بعده
قام الشجيع وعينه مربوطة والدم ظاهر على الرباط وقال ماحدث معه
فقال القاضى انت رجل شجاع واردت ان تمسك المتهم ففقأ عينك وعليه يجب القصاص من الجاني
ففرح الرجل ولكن القاضي أكمل وهو ينظر للحاكم قائلا ولكن أنت لست من أهل المدينة الأصليين
ولست علي عقيدتنا وهنا يجب إقامة نصف الحد على جحا
فازبهل الرجل وقال كيف يكون ذلك يا سيادة القاضي
فرد القاضي بان يقوم جحا بفقء عينك الثانية ثم يقام عليه نصف الحد فتفقأ انت احدى عينيه
فبكى دموعا ودما وهو يقول لالالالالالالالا انا متنازل فغرمه القاضى بالف دينار
وقام التالى وقال: كان لى اخ واحد يساند كل منا الاخر فى الحياة وليس لنا سوى بعض وكان طيبا
ودائما فى الجامع واليوم نام تحت المادنه حتى تحين صلاة العصر فقفز عليه هذا المجرم فقتله
فابدى القاضى تأثره وظن الحاكم ان قاضيه لن ينجو من هذه الورطة
فقال القاضى من قتل يقتل .
فنسى الرجل حزنه على أخيه وقال فرحا يحيا العدل يحيا العدل
فقال القاضى مرة اخرى من قتل يقتل ولكن بنفس الطريقة
وهنا بهت الرجل وتساءل : كيف ؟
فقال القاضى ان ينام جحا مكان اخيك وتقفز عليه انت مثلما قفز على اخيك
فبكى وقال ماذا لو مت انا من القفزة وليس هو او مات معى من يرعى اولادى واولاد اخى
لالالالالا لن اعرض نفسى للموت من اجل ميت انا متنازل
ودفع الف دينار غرامة وهو يقول ياروح ما بعدك روح والحى ابقى من الميت
ثم قام الثالث قبل ان ينادى عليه احد وقال : سيادة القاضي أنا الفرارجي صاحب الحمار
الذي سقط ذيله دون ان يلمسه جحا او غيره فاسقطنى الحمار وكسر ذراعى وهذه الألف دينار الغرامة
وهنا اعلن القاضى رفع الجلسة بعد ان اسقاط كل التهم عن جحا
فانصرف الناس مطأطئ الرؤوس ولم ينبس احدهم بهمسه
بينما كاد الحاكم يحتضن القاضى بعينيه ثم نظر مبتسما الى جحا
فرآه مزغططا ويشير لمولاه بيديه اشارة معناها انه سيرسل له كل يوم بطة سمينه مربربه

الثلاثاء، ٤ سبتمبر ٢٠٠٧

مقتطفات




اضـرمـت فـى قلـبى الوجـع


وولـيت هـاربـة...! ؟


............لابـأس


حـتمـا سنلتقـى


عنـد أول الجحيـم


مشـالى





مكتـوب علـى بـاب الخطيئـة


للذنـب فيـه مليـون طريقـة


والكـدب لابـس الـف وش


فمـا ترتعـش


على الشوكى




ولـدى نصحتـك لمـا صوتـى إتنبـح


ماتخفـش مـن جنـى ولا من شبـح


وإن هـب فيـك عفريـت قتيـل اسـأله


مادفعـش ليـه عن نفسـه يوم ما اندبـح


عجبى


صلاح جاهين

الاثنين، ٣ سبتمبر ٢٠٠٧

صافيناز



فرحت وقالت لأمها : "البهاء" نثرنى في ارض قصائده عشبا
قالت أمها : البهاء بحر مارق .
"كل الأنهار تجرى إلى البحر والبحر لا يجرى اليها" فكيف يغضب البحر
حين يرشه" مطر الأربعاء بالمحبة" والجنون ؟
لم تخبر أمها بأنه حاول رشف كافور نهديها

فقالت له "لا تجرب مد يديك فأنا كهربااااء

لكنها أخبرته بما قالت أمها عنه : يداه فاضيتان
كادت تسقط نظارته الكبيرة عندما أنتفض واقفا،

فأعاد تثبيتها وهو يتمتم : الشك॥المطلق॥اليقين

ما عدت هامشيا ولا عادت المدن الهامشية تراودني
ولا عادت تألفني أضرحة العارفين بالله
ولا كنائس سوهاج

التقليديون / آخر فرمان/آخر امرأة ضاجعها جن السلطان
والذي جاء ينجيك من دمي حان وقت التمرد

..... قالها ومضى
مضى وقت طويل وصافيناز لا تذهب إلي ،والبحر لا يدخل شارع المطار
تأكد البحر أن لا جمع له /لاأثنين /لا واحد
فدخل شارع المطار رمي عينيه سقطتا في قلب صافيناز ابتسمت.. أبتسم ..

نادى : حي على الرصيف